Azərbaycan Respublikası Əmək Məcəlləsinin 172.5-ci maddəsinə əsasən, əmək haqqının verilməsi işəgötürənin təqsiri üzündən gecikdirildikdə və bu hal fərdi əmək mübahisəsi yaratmadıqda, işəgötürən əmək haqqının verilməsinin gecikdirildiyi hər gün üçün işçiyə əmək haqqının azı bir faizi məbləğində əlavə ödənc verməlidir.

Bəs işçiyə ödənilən bu əlavə ödənc onun gəliri hesab edilərək vergiyə cəlb olunur, yoxsa kompensasiya xarakterli ödəmə hesab edilərək vergidən azad edilir?

Azərbaycan Respublikası Əmək Məcəlləsinin 172-ci maddəsinin 5-ci hissəsinin şərh edilməsinə dair Konstitusiya Məhkəməsi Plenumunun 11 aprel 2023-cü il tarixli qərarına əsasən, əmək haqqının gecikdirilməsinə görə ödənilən ödəncin kompensasiya xarakteri daşıdığını müəyyən edə bilərik.  

Belə ki, sözügedən qərarda “əmək münasibətləri çərçivəsində əmək haqqının gecikdirilməsinə görə ödənilməsi nəzərdə tutulan kompensasiya” ifadəsinin istifadə olunması əmək haqqının gecikdirilməsinə görə ödənilən ödəncin kompensasiya xarakterli ödəniş olduğunu təsdiq edir.

Azərbaycan Respublikası Vergi Məcəlləsinin 102.1.10-cu maddəsi isə dəymiş zərərlərin ödənilməsi ilə bağlı alınan kompensasiya ödənişlərini vergidən azad edir.

Beləliklə, qanunvericiliyə əsasən, əmək haqqının gecikdirilməsinə görə ödənilən ödənc kompensasiya xarakteri daşıdığı üçün vergidən azad hesab olunur.